Dens l’encastre de la mesa en plaça de l’accion academica « Víver la cultura occitana uei », lo Licèu Borda de Dacs, inscrivut au projècte d’educacion artistica e culturau tà l’an 2017/2018, qu’arcuelherà lo dimars 4 de julhet 2017 l’InÒc Aquitània tà un dia de tribalh programatic.

Mélanie Larché, Cap de projècte mediacion numerica a l’InÒc, e Maude Puech, professora relai tà l’occitan en Navèra Aquitània, que definiràn ad aquesta occasion ua ficha accion entà cadun deus sheis projèctes academics entà acompanhar au mei plan cada ensenhaire dens la tematica causida. La creacion d’un module numeric interactiu dedicat au patrimòni culturau immateriau que serà tanben au còr de la reünion. Imaginat entà s’adreçar aus primaris, atau com aus collegians e liceans, la soa mesa en linha qu’ei prevista tà la rentrada 2017/18.