Que s'ei mort aqueste mes d'aost a l'atge de 102 ans René-Guy Busnel. Au long d'ua carrièra de las frutècas, aqueth especialista de bioacostica qu'aucupè los pòstes de cercaire au CNRS, de director de recèrca a l'École pratique des hautes études e a l'INRA, e de professor a la City University of New-York.

Qu'estó l'un deus purmèrs a s'interessar aus lengatges shiulats e a'us estudiar, a las islas Canàrias, en Turquia e plan segur en vath d'Aussau. Los tribalhs de recèrca e de collectatge qui miè au vilatge d'Aas a la fin de las annadas 1950, de màger qualitat, que hèn tostemps referéncia. Après la mort deus darrèrs shiulaires aussalés, quan lo monde e pensavan aqueth mòde de comunicacion de longa distància desparegut de Bearn, los documents qui avè arrecaptat e los sons conselhs que permetón a Gérard Pucheu, fondator de l'associacion « Lo Siular d'Aas », de n'entinoar l'arrenavida.

President d'aunor de l'associacion, René-Guy Busnel que contunhava de s'interessar aus progrès de la recèrca en aqueth maine – com la descubèrta per Gérard Pucheu en 2013 de shiulaires en las montanhas de l'Atlàs en Marròc – e de seguir l'aviada deus cors de shiular, mei que mei au collègi de Laruntz.

En 2015 enqüèra, qu'avè recebut au Senat, de las mans de Georges Labazée, la Medalha d'aunor deu departament deus Pirenèus Atlantics per l'ensemble de las soas recèrcas suus lengatges shiulats e suu lengatge shiulat d'Aas.

- Felip Biu