Hubert Dutech qu’ei l’autor d’un navèth diccionari lingüistic e etnologic, Dictionnaire des vallées et du piémont béarnais, dedicat a mei d’un parçan deu Bearn. Qu’ei sortit au mes de noveme 2018.

« Dab la soa foncion prumèra de repertòri, aqueth diccionari que compòrta elements etnologics, societaus, topologics, patronimics, topologics, atau com referéncias a l’istòria anciana capvath cartas e fòrs, e tanben contemporanèa bearnesa a travèrs un sarròt d’escriuts de "peluts" qui serén estats urós de hestejar dab nosautes lo centau cap d’an de l’armistici de 1918. Un sarròt d’escriuts que rebaten la vita vitanta deus nostes ajòus, dab detalhs hèra precís e esmavents. Hòra los tribulòcis de la vita de tot dia, los nostes autors qu’an sabut divertí’ns, sovent dab un esperit plasent.
Shens preténder a l’exaustivitat –d’aulhors impossibla a aténher- aqueste diccionari ric de mei de 20000 mots qu’escoba convenientament lo sector bearnés estudiat, en l’enriquint dab un hèish de domenis desvolopats. Totun la màger originalitat d’aqueste obratge qu’ei d’aver balhat la màger part au sarròt de contemporanèus dab los quaus e’m soi entertiengut longadament en un ambient hòrt calorent. » - Hubert Dutech

Tà’n saber mei