InocCirdoc

Per arrestat prefectorau, M. Étienne Guyot, prefècte de la region Occitània, que vien d’actar la creacion de l’establiment public de cooperacion culturau deu « Centre international de recherche et documentation occitanes - Institut Occitan de Cultura », qui prenerà d’ací quauques setmanas la seguida de l’InÒc Aquitània e deu CIRDÒC a l’entorn de missions alargadas e d’ambicions navèras entau desvolopament de la cultura occitana.

La creacion d’aqueth establiment public culturau a vocacion nacionau e internacionau que hè seguida a la volentat conjunta de las Regions Occitània e Navèra Aquitània, deu Ministèri de la Cultura, deus conselhs departamentaus deus Pirenèus Atlantics, d’Erau e d’Aude, de las comunautats d’aglomeracion de Pau-Bearn-Pirenèus e de Besièrs-Mediterranèa e de la Vila de Besièrs, de dotar la cultura occitana d’ua grana institucion scientifica e culturau encargada de la sauvaguarda, de la coneishença e de la promocion de la cultura occitana dens lo mond deu sègle XXIau.

Lo futur establiment, qui serà operacionau a comptar deu primtemps 2019, qu’amassarà los mejans, mestièrs e competéncias deus dus operators istorics entà l’accion publica a favor de la cultura occitana : lo CIRDÒC e l’InÒc Aquitània.

Vint-tres ans après la creacion, en 1996, de l’Institut Occitan, prumèr organisme professionau dedicat a la socializacion de la lenga e de la cultura occitanas, l’InÒc Aquitània que’s regaudeish de la volentat partatjada per nau collectivitats publicas, de las quaus lo Ministèri de la Cultura, de crear un utís culturau de prumèr plan, de nivèu internacionau, qui deverà respóner aus grans defís culturaus, sociaus, tecnologics e economics deu sègle XXIau.