Deu 22 au 25 d'agost, lo còr d'Occitania que pataquejarà deu costat de Pau au parat deu hestau interregionau Hestiv'Òc. Augan un còp mei, lo CIRDÒC-Institut Occitan de Cultura que serà present tot deu long de l'eveniment entà'vs perpausar accions de mediacion e rendetz-vos culturaus, invitacions a descobrir las diferentas facetas d'ua cultura e d'ua literatura occitanas vivas.

PrumersSecors

Centre de purmèrs secors occitans —Deu 22/08 au 25/08, estadi Tissié.

En 30 minutas crono, aqueth caminament d'activitats interactiu e ludic que permet a cadua e cadun, petitons e grans, de passar un moment conviviau en familha e de tastar las soas coneishenças, abans de descobrir lo son perhiu (l'occitan curiós, l'occitan qui l'a dens l'aurelha, l'occitan qui's coneish...).
Enveja de perlongar l'experiéncia o de's préner temps entà pausà's ? Dab los transats de mau evitar, los espacis de jòcs e d'aledada deu Centre qu'arcuelhen tota la familha segon las envejas : « musicoterapia » dab los clucs sonòres, bibliotèca efemèra, iniciacion aus jòcs tradicionaus, etc.

« Los imnes de Hestiv'Òc » : conferéncia en cançon de Jan Jaques Castéret — Lo 23/08 a 11 : 00 — Pabalhon de las Arts

Entad ac tot saber deus imnes de Hestiv'Òc : Aqueras montanhas (Se Canti), Bèth Cèu de Pau, L'Immortèla, La Sobirana.

D'on vienen aqueras cançons qui, per uas, an traucat los sègles ? Quin son vadudas imnes de Bearn e a còps de l'ensemble occitan, uei lo dia cantadas autanplan per las cantèras com pendent las manifestacions oficiaus o los grans encontres esportius : Jòcs olimpics d'ivèrn de Turin a l'Estadi deu Hamèu ?
Dab l'ajuda de las preciosas edicions de recuelhs cançonèrs bearnés deu començar deu sègle XIXau conservadas au demiei de colleccions patrimoniaus de la Mediatèca de Pau e deu CIRDÒC (Site Mediatèca-Besièrs 34), mes tanben d'enregistraments sonòres e audiovisuaus deus quaus los mei ancians estón collectats au près de Peluts bearnés e gascons, presonèrs en Alemanha en 1916, enter istòria e legenda, ça-vietz descobrir la longa istòria de la canta bearnesa.
Ua descobèrta qui s'acabarà de segur en cançon, puish a qu'èm en Bearn e a Hestiv'Òc !

On s'i parla pas mei de « musica » : mustra. Deu 22 au 25/08. Pabalhon de las Arts

Ua mustra entà un apròchi transversau e oniric de las musicas popularas deus país d'Òc de ger e de uei. Enter documents d'archius e espiars transversaus, que s'ageish de hicar en relacion practicas e citacions entà tribalhar los imaginaris de doman.

Aperitiu literari : actualitat de l'edicion occitana d'ací e de uei – Lo 25/08 a 11:30 – dimenge matin suu platèu de Ràdio País

Lo CIRDÒC-Institut occitan de cultura qu'invita los editors occitans (Per Noste, Cairn, Letras d'Òc...) a viéner presentar au parat d'un temps conviviau, la lor actualitat editoriau recenta. Ua òra entà descobrir los romans, las novèlas... en preséncia deus qui'us produseishen e se n'avem lo parat, deus qui'us redigeishen.

Animator :
Jan Nadau Commères (Ràdio País)

Autors :
Joan Loís Lavit, Bèth peu de sau, Letras d’Òc, 2018 ;
Felip Biu, Quaranta tres, Per Noste, 2019 ;
Sèrgi Javaloyès, Viral, In8, 2018 ;
Philippe Lescarret autour des enquêtes du lieutenant Loubeyres (4e tome à paraître en septembre), CAIRN

DESCOBRIR L'ENSEMBLE DE LA PROGRAMACION 2019 : ACÍ