Lo 20 de deceme que s'aviarà ÒC Tele, la purmèra cadena de television tota en occitan. Que perpausarà tot dia quate òras de programas, de sheis òras e mieja a dètz òras e mieja deu ser. 

« Conta'm », l'associacion qui hè doblatge en occitan, que sòrt de har paréisher tres DVD’s. « Gruffalò », « Kerity, l’ostal dels contes » e « Lo jorn de las gralhas », d’ara enlà que's pòden espiar en lenga nosta.

Lo dijaus 19 de deceme a Artigalotan, Pèire Salas qu'animarà ua reünion publica entà presentar los tribalhs de restitucion de las enquistas microtoponimicas miadas per l'InÒc d'Aquitània.

Le Lecteur du Val, associacion de las bibliotècas deu Sicoval, que perpausa lo son 16au concors de novèlas. Qu'ei possible d'i participar en francés o en occitan, mercés a un partenariat dab la Calandreta de Castanet.

NY’òc Trobadors, l’espectacle multilingüe e multiculturau de Joan-Francés Tisnèr, Jakes Aymonino, Nicole Peyrafitte, Pierre Joris e Domenja Lekuona, que serà presentat lo dissabte 23 de noveme au Poets House de Manhattan, a New York. 

Lo grop Nadau qu'ei de cap a preparar un CD qui deu sortir lo mes qui vien. Que's titolarà « L'Encantada » e que comprenerà 14 títols e un liberet dab los tèxtes en occitan e la lor arrevirada en francés. 

Un navèth grop de musica que s'ei creat per las Lanas. Dià qu'ei compausat deu cantaire Didier Tousis, deu guitarrista Max Desbieys e deu maquinista Florian Larriveau. 

Aqueste estiu qu'estó rodat per las Lanas un filme en occitan que sortirà abans la fin de l'annada. Qu'ei « Joantiròt » deu fotografe deu Mont, Jacques Baris. 

ECLA-Aquitània que lança las inscripcions tà la residéncia « editor aquitan – autor estrangèr ». Aquesta que permet d'arcuélher un autor estrangèr publicat per un editor aquitan pendent dus mes.

Deu 12 dinc au 15 de seteme qui arriban, qu'ei a Salias de Biarn que's harà la Hèsta de la Sau, entà la 33au annada ad arron.

Las hèstas de Baiona de 2013 que s'avièn lo dimèrcs 24 de julhet. Ad aqueth parat, mei de 40 000 festaires que vedón e qu’entenón a Natasha St-Pier a declamar lo prosei en occitan.

L'associacion Conta'm, lo Cap'òc e lo Conselh generau deus Pirenèus Atlantics qu’invitan los mainatges au cinèma.