A la fin deu mes de genèr qu’estó inaugurada a l’Institut Ramon Llull de Barcelona la Bibliotèca Bernard Lesfargues, especializada dens las traduccions en d’autas lengas d’òbras literàrias e de pensada escriutas en catalan. 

Com tot an, l'associacion Leis Amics de Mesclum e lo jornau La Marseillaise qu'organizan lo lor concors « Escriure en lenga d'Òc ». Qu'ei obèrt dinc au prumèr d'abriu. 

Ua navèra associacion tà la cultura nosta qu'ei vaduda. Que s'apèra Barataria e qu'a per tòca la promocion de l'eretatge culturau landés (e mei largament bascogascon) au mejan de manifestacions culturaus. 

EHZ, lo hestau de musica basco qui's hè tot an a Lekorne (Mendiondo), qu'avia lo son concors EHrZ. Aqueth trampolin de musicas actuaus, despuish l'an passat qu'ei obèrt a totas las culturas minoritàrias. 

La revista Lo Bornat que prepausa un numèro especiau suu cant en lenga d'òc tau son darrèr numèro de 2014. 

La FAMDT qu'edita un « Guida de las bonas practicas » tau tractament documentari deus archius sonòrs inedits. Que s'adreça a tots los qui vòlen tractar las lors colleccions entà las partatjar. 

Oralitat de Gasconha, lo labèl de qui la tòca ei de transméter lo patrimòni culturau orau deus Pirenèus gascons, que sòrt d'aubrir lo son site Internet. 

Lo Conselh Generau d'Aran qu'avia la XVau edicion deu prèmi Aran de literatura, prèmi de narracion, poesia e conte entaus mainatges. 

Lo Conselh generau de las Hautas-Pirenèas qu'avia la 23au edicion deu son concors bigordan d'expression gascona. Dinc au 27 de heurèr, que podetz enviar tèxtes suu tèma « Nosta tèrra ». 

« Vita e memòria de l’Ador / Vie et mémoire de l'Adour » qu’ei ua operacion de colècta filmada sus la vita e la memòria deu fluvi Ador, miada au près de nombrós testimònis occitanofònes deu Baish Ador, comandada peu Conselh generau deus Pirenèus Atlantics a l’InÒc Aquitània – Etnopòle, e hèita per Yvan Bareyre e Caroline Dufau.

Lo Parc naturau regionau Peirigòrd-Lemosin, en 2015 que sostienerà encontres sus la cultura, l'istòria e la lenga deu país, dens totas las disciplinas, qui's haràn suu son territòri. Que podetz enviar los vòstes projèctes dinc au 12 de genèr. 

Le Lecteur du Val, en aliança dab la Calandreta de Castanet, que torna aviar lo son concors de novèlas en francés e en occitan. Que i podetz participar dinc au 23 de heurèr, en totas las variantas.