Operator regionau

L'InÒc Aquitània, operator regionau entà la lenga e la cultura occitanas, que respon a la volontat de la Region Navèra Aquitània, de la DRAC Navèra Aquitània, deus Departaments aquitans e de las intercomunalitats qui a per mira de sostiéner e de desvolopar la practica de la lenga e de la cultura occitanas (en las soas tres fòrmas aquitanas : gascona, lengadociana, lemosina). Qu'amassa los sons partenaris publics, lo monde associatiu regionau e los actors scientifics e culturaus màgers a l'entorn de la soa equipa professionau.

Qu'a la sedença a Vilhèra au Castèth d'Èste, en la Comunautat d'Aglomeracion de Pau-Pirenèus on ei « estructura d'interès comunautari ». l'InÒc Aquitània que s'està au prumèr solèr d'aqueth equipament culturau vaste e luminós mentre que l'auta partida ei aucupada per la Mediatèca d'Este. La soa accion regionau qu'ei definida en ua convencion pluriannau dab l'Estat e los cinc departaments aquitans. Que segueish sèt missions prioritàrias.

Etnopòle

Lo labèl Etnopòle qu'ei ligat a ua institucion qui, per çò qu'ei de la recèrca, de l'informacion e de l'accion culturau, òbra au nivèu locau e au nivèu nacionau en medish temps. Peu biaish d'aquera apelacion, la Direccion deu Pilotatge de la Recèrca e de la Politica Scientifica deu Ministèri de la Cultura que vòu promòver ua reflexion de nivèu haut, qui participa en medish temps a las vias de desvolopament de la disciplina etnologica e a ua politica de constitucion de las basas d'ua accion culturau concertada. Lo labèl qu'estó atribuit a l'InÒc Aquitània en tres maines : l'etnomusicologia de la França, la sauvaguarda deu patrimòni culturau immateriau (PCI) de l'espaci occitan e l'etnologia deus territòris.
En aqueth encastre, l'InÒc Aquitània que mia accions d'inventari deu PCI, de valorizacion numerica – Sondaqui – e de mediacion de las practicas e deu saber-har ; qu'organiza lo seminari annau en etnomusicologia de la França.

Missions prioritàrias

Obrar en Aquitània e, a demanda deus sons partenaris publics, en l'interregionalitat, entà sauvaguardar lo PCI de l'espaci occitan, en favor de l'etnologia deus territòris ; entà l'animacion de la recèrca en etnomusicologia de la França, segon los tèrmis e las competéncias definidas per la Convencion d'Etnopòle. L'InÒC Aquitània que hè lo ligam enter lo patrimòni culturau immateriau e lo patrimòni materiau.

Obrar en favor de la Socializacion de la lenga occitana en la soa diversitat, tau com se tròba suu territòri regionau, auprès de publics ciblats en har tribalhs de traduccion-conselh, afichatge, terminologia, toponimia. L'InÒc Aquitània qu'ajuda en assistir a la mestresa d'òbratge publica o a la mestresa d'òbra de l'Ofici Public de la Lenga Occitana peu biaish d'un convencionament ad hoc, o a la demanda deus sons partenaris publics.

Concéber apèrs numerics qui son ressorsas entà l'Educacion Artistica e Culturau en lo maine occitan e acompanhar los mediators en aqueth maine en ligason dab lo CAPÒC.

Respóner a la demanda deus sons partenaris publics per tota mission d'expertisa.

Avalorar per las Tecnologias de l'Informacion e de la Comunicacion las soas realizacions, las deus partenaris publics e de tot lo movement associatiu aquitan, en l'encastre de las soa competéncias.

Sauvaguardar e avalorar los hons e cabaus patrimoniaus e tanben la memòria orau occitana. L'InÒc Aquitània qu'a la carga de la mesa en òbra d'un plan regionau de sauvaguarda e de valorizacion deus hons sonòrs e audiovisuaus d'Aquitània en la dinamica de l'apèr regionau « Sondaqui », en ligason dab lo programa Aquitània Culturas connectadas e los sons membres per la part valorizacion peu numeric. Tanben que valoriza las ressorsas numericas deu patrimòni literari occitan d'Aquitània, com per exemple lo patrimòni deus trobadors per l'intermediari deu site « Trobadors d’Aquitània ». Se los partenaris publics ac demandan, aqueth plan que's poderà har a l'escala interregionau.

Acompanhar los actors de la Lectura Publica en Aquitània en ajudà'us a dispausar de hons occitans adaptats aus territòris de las meditatècas pertocadas. L'InÒc Aquitània que pòt tanben formar los mediatecaris entà utilizar aqueth hons e ajudar a'us animar entà trobar publics deus naus. L'InÒc Aquitània que poderà en mei d'aquò, a demanda deus partenaris publics, jogar lo ròtle d'estructura-relais entà avalorar lo libe d'expression occitana e entà estructurar la hialèra libes-editors occitans.