L'InÒc Aquitània, operator privilegiat de la Region Aquitània qu’ei installat aus locaus deu castèth d'Este a Vilhèra, dens la Comunitat d'Aglomeracion Pau-Pirenèus. L'InÒc que s’està au prumèr solèr d’aqueth monument qui partatja dab la Mediatèca d'Este : qu’ei un espaci deus grans e luminós dedicat a la cultura e mei que mei a la lenga e a la cultura occitanas.

L’InÒc, operator privilegiat deu Conselh regionau d’Aquitània, que respon a la volentat de la Region Aquitània, de la DRAC Aquitània, deus Departaments aquitans dont los Pirenèus Atlantics e las Gironda, e d’intercomunalitats aquitanas, de sostiéner e de desvolopar la practica de la lenga e de la cultura occitanas (en las 3 variantas aquitanas : gascon, lengadocian & lemosin). Qu’amassa, au son còr, los partenaris public, lo monde associatiu regionau, los actors scientifics e culturaus de Bearn, de Gasconha e d’Aquitània, a l’entorn d’ua equipa professionau disponibla e competenta.

L'InÒc Aquitània que tribalha tà perennizar d’ua antena creada a Anglet, en Baish Ador, dens locaus partatjats dab l’associacion " Aci gasconha ". Que hè òbras mei que mei entà har vàler la preséncia de la lenga occitana (lo gascon) per aquera bèra ola de vita encamarlada enter los Pirenèus Atlantics e las Lanas, vertadèra palanca naturau enter las culturas basca e gascona. En mei de las missions mei generaus de l’InÒc, que concèu e mia accions adaptadas ad aqueth parçan, en federar los actors culturaus gascons aplegats au còr de l’associacion « Ligam », e en ligason dab l’ensemble deus actors de la lenga e de la cultura bascas.

Las missions prioritàrias soas :

1. Socializar la lenga occitana de cap a tots los Aquitans (en las 3 variantas aquitanas : gascon, lengadocian e lemosin). L’InÒc qu’ei reconegut peus partenaris publics com competent dens lo domèni de la plaça de la lenga dens la vita publica. Que s’ageish de desvolopar e de promòver lo bilingüisme de cap a l’ensemble deus actors de la vita culturau, sociau e economica d’Aquitània ;

2. Perseguir, ahortir e desvolopar lo tribalh hèit en collaboracion dab lo Ministèri de la Cultura e de la Comunicacion & la Drac, la Region e los 5 departaments d’Aquitània arron la valorizacion deu Patrimòni Culturau Immateriau (P.C.I.). L’InÒc qu’ei encargat de la mesa en òbra d’un plan regionau de sauvaguarda e de valorizacion deu patrimòni orau occitan d’Aquitània, sustot dens lo projècte de portau internet « sondaqui.com » ;

3. Emplegar las Tecnologias de l’Informacion e de la Comunicacion entà har conéisher las realizacions soas, com las deus sons partenaris publics e tanben l’ensemble deu movement associatiu aquitan ; Assegurar missions d’expertisas a la demanda deus sons partenaris publics dens los domènis de competéncia qui son los sons.

4. Dens l’encastre de l’estudi hèit en 2008 per l’ARPEL Aquitània a la demanda de la Region Aquitània sus l’edicion en lengas de França en Aquitània (occitan & basco), l’InÒc qu’ei encargat de la realizacion de las preconizacions d’aqueth estudi de cap aus actors de la hialèra de l’edicion d’expression occitana ;

Los salariats de l’InÒc Aquitània que v’atenden deu diluns dinc au divés de 9h a 12h30 e de 14h a 18h. Tots los qui desiran informacions, collaboracions, sostiens adaptats a las doas demandas que son planvienguts.

Sedença

Castèth d'Este- BP 326 - 64141 Billère/Vilhèra cedex

Tel : 05 59 13 06 40 Fax: 05 59 13 06 44

Aquera adreça email qu'es aprigada contre las maquinas deus espamaires, que'vs cau activar Javascript tà la véder.