Dens l'encastre de la soa mission regionau d'educacion artistica e culturau, l'InÒc Aquitània augan que collabòra dab establiments aquitans dens l'encastre de trajectòrias d'EAC. Atau, qu'a creat entà las classas DaquíDòc, un portau web « lenga e cultura occitana » qui auhereish un accès privilegiat a las ressorsas numericas utilas a las trajectòrias d'EAC. D’auta part, qu'assegura l'acompanhament deus ensenhaires tà la creacion de las trajectòrias : intervencions d'artistas, animacions de talhèrs...

Qu’ei lo cas au Licèu Louis Barthou de Pau tà l'ensenhament d'exploracion « Creacion e activitats artisticas, opcion patrimònis » : augan ua classa de 18 escolans de segonda que consacra ueit sesilhas au Patrimòni culturau immateriau deu domeni occitan. Qu'ac hè tanben ua classa tà l'inclusion escolara de Podensac (Gironda), qui escolariza mainatges deu cicle elementari en situacion de handicap, e la trajectòria qu'ei centrada suu jòc de quilhas de sheis, hèra popular en Gasconha.