Dens l’encastre de la soa mission regionau d’educacion artistica e culturau, l’InÒc Aquitània que collabòra dab establiments escolars entà la creacion de percors d’EAC. Entad aquò qu’a concebut, tà las classas, lo portau Web DaquíDòc (http://www.daquidoc.org/fr/), permetent un accès privilegiat a las ressorsas numericas « Lenga e Cultura occitanas ». Qu’assegura de mei l’acompanhament deus ensenhaires entà la realizacion deus percors : intervencions d’artistas, animacions de talhèrs, etc.

Au cors de l’annada 2016-2017, l’InÒc Aquitània qu’a acompanhat tres ensenhaires dens tres establiments aquitans. Cadun qu’a causit la tematica qui desirava tribalhar dab la soa classa.

 

Podençac : 120 mainats de Gironda que descobreishen las Quilhas de 6

Dab lo sostien de l’InÒc Aquitània, la classa ULIS de Mathieu Labarsouque a Podençac qu’a tribalhat pendent ueit setmanas suu jòc de quilhas de sheis emblematic de la Gasconha. (http://www.daquidoc.org/fr/mon-peac/m-inspirer/144-les-quilles-de-six-decouverte-et-transmission-d-un-jeu-du-patrimoine-regional).

Au programa : descobèrta de las règlas deu jòc dab Christian Lassos, President deu comitat de quilhas de sheis de Gironda ; materiau creat per l’enterpresa Favaro d’Haget ; e lexic occitan specific dab Eric Roulet de l’associacion Gric de Prat.

Los eslhèves que realizèn alavetz afichas presentadas davant quate classas qui inicièn au lor torn ad aqueste jòc. Puish torneis per atge qu’estón organizats : tornei CP-CE1, tornei CE2 e tornei CM1. Los eslhèves que’s deishèn gahar au jòc e lo public qu’assistí a bèras partidas de quilhas de sheis. Lo darrèr jorn que’s hasón las finalas e lo mieidia ua competicion adulta dab los ensenhaires, los susvelhaires e las cantinèras de l’escòla.

Un escaduda de las granas tau programa e los torneis qui an amassat peu torn de 120 eslhèves.

 

Licèu Bordá de Dacs : Musicas de Gasconha

Maude Puech, professora d’occitan au licèu Bordá de Dacs que causí per tematica los instruments tradicionaus en Gasconha, de ger dinc a uei (http://www.daquidoc.org/fr/mon-peac/m-inspirer/145-les-instruments-traditionnels-en-gascogne-d-hier-a-aujourd-hui).

Ua purmèra intervencion de Joan Jaques Castéret qu’iniciè los eslhèves a la nocion de patrimòni culturau immateriau e a las musicas tradicionaus. Que continuèn de descobrir en autonomia dab utís numerics com DaquíDòc, Sondaqui, YouTube, etc.

Musica que significa escota musicau e tòc musicau. Los eslhèves que podón apregondir las nocions apresas pendent las sesilhas precedentas gràcias a las intervencions de Simon Guillaumin (professor de sonsaina et d’acordeon diatonic au Conservatòri de las Lanas). Que podón enténer, tocar, ensajar e compréner las particularitats e evolucions d’instruments tradicionaus (sonsaina, tamborin, flabuta de tres horats, etc.). Divèrsas practicas e saber-har ligats a la practica musicau qu’estón tanben abordats :

- fabricacion deus instruments dab la visita deu talhèr de luteria de Serge Cladères a Mont·hòrt

- danças tradicionaus, conte e processus de transmission per lo « Primtemps de l’Arribèra » on los eslhèves que presentèn lo lor tribalh a l’entorn deu conte « lo gojat qui cridava au lop » e realizèn ua òbra dab traças de pas deu rondèu qui evòca las estapas de transmission, cada color de pas correspondent sia aus aprenents, aus confirmats o aus sapients.

 

Licèu Louis Barthou de Pau : lo PCI, ua navèra categoria patrimoniau

Dab los sons eslhèves de 2nda, ensenhament d'exploracion « creacion et activitats artisticas opcion Patrimònis », Jean-Marc Birou que tribalhè sus la nocion de patrimòni culturau immateriau per practicas vivas tradicionaus occitanas (http://www.daquidoc.org/fr/mon-peac/m-inspirer/146-parcours-de-decouverte-du-patrimoine-culturel-immateriel-occitan-en-nouvelle-aquitaine). Lo patrimòni, qu’ei aquò ? A qué e hè referéncia aquesta nocion e qué modifica aquera ?

Tot lo long de ueit sesilhas, los eslhèves que descobrín la « Convencion de l’Unesco entà la Sauvaguarda deu Patrimòni culturau imateriau » ; la soa mesa en aplicacion en França e notadament en Navèra Aquitània ; los aspèctes metodologics de l’inventari nacionau e los utís de valorizacion numerica. Dab Mélanie Larché, encargada de mediacion deu PCI a l’InÒc Aquitània, que pensèn sus las lors practicas vivas e lo lor environament culturau. De mei, un tribalh en autonomia qui a per mira de produsir un exposat (en binòmi) sus ua practica viva locau de la lor causida que’us permetó de s’iniciar a la recèrca sus Internet, a las questions de drets d’autors e a las practicas numericas. Fin finau, ua presentacion orau deu lor tribalh qu’estó produsida davant la lor classa.

 

Rendètz-vos tà l’an qui vien entà la retrospectiva de 2017-2018 e consultar los tribalhs produsits per los eslhèves sus las corsas landesas, las chancas, los jòcs tradicionaus, Feliç Arnaudin, Alienor d’Aquitània, etc.