La tresau edicion de las jornadas de formacion au Patrimòni Culturau Immateriau coorganizada per l’Etnopòle InÒc Aquitània e lo laboratòri ITEM de l’UPPA, en partenariat dab lo Departament deu pilotatge de la recèrca e de la politica scientifica deu Ministèri de la Cultura, que’s hasó deu 18 au 22 de heurèr a Vièla en Vath d’Aussau.
Un trentenat d’estudiants e professionaus que participèn ad aquera edicion dont la tematica centrau èra lo patrimòni culturau immateriau en territòri de montanha e qui per l’escadença establí un partenariat dab lo Parc Nacionau deus Pirenèus.

La tòca de las jornadas de formacion qu’èra de sensibilizar los participants a la nocion de patrimòni culturau immateriau, a las metodologias e proceduras de constitucion de l’Inventari nacionau e aus utís de valorizacion existents entad aqueth patrimòni viu e en constanta transformacion.
La formacion que consistiva en presentacions de professionaus qui tribalhan dens lo domeni deu patrimòni culturau immateriau en França a diferentas escalas, autant com tribalhs practics d’enquèstas suu terrenh e d’elaboracion de las fichas d’inventari, e com seradas culturaus de descobèrta deu patrimòni culturau immateriau de la Vath d’Aussau.

Fumiko Ohinata (capdau de l’Unitat de mesa en òbra de la convencion de sauvaguarda deu Patrimòni Culturau Immateriau de l’UNÈSCO) e Isabelle Chave (capconservatora deu patrimòni e adjunta au capdau deu Departament deu Pilotatge de la recèrca e de la Politica scientifica a la Direccion generau deus patrimònis deu Ministèri de la Cultura e de la Comunicacion) qu’obrín lo prumèr dia de formacion dab ua presentacion de la Convencion entà la sauvaguarda deu Patrimòni Culturau Immateriau de 2003 de l’UNÈSCO de la quau la França ei signatària e deus principaus enjòcs de la soa implementacion au nivèu nacionau e internacionau.

Las jornadas de formacion que comptèn tanben dab la participacion de Guy Di Méo (geografe) qui expausè las relacions entre las practicas umanas e la constitucion deus territòris, Dominique Cunchinabe (antropològue) qui presentè la practica deu huec pastorau en montanha e pèmont pirenenc, Raphaëlle Garreta (encargada de mission a l’etnologia, Conservatòri botanic nacionau deus Pirenèus e Mieidia Pirenèus) qui devisè deus saber-har deus cuelhedors professionaus de plantas sauvatjas e de Marie-Tatiana Martin (encargada de las mediacions numericas & EAC, Etnopòle InÒc Aquitània) qui expausè lo tribalh de valorizacion numerica deu patrimòni culturau immateriau miat per l’Institut Occitan.

Un deus punts hòrts de la formacion qu’èra la possibilitat d’escambiar dab actors regionaus qui hèn víver las practicas culturaus de la Vath d’Aussau a l’escadença de taulas redonas e d’enquèstas suu terrenh. Gérard Sarrailh (maire de Lobier de Haut), Joseph Paroix (pastor, Vilhèras d’Aussau), Isabelle Bergès (vicepresidenta encargada de la cultura – Comunautat de comunas de la Vath d’Aussau), Jean-Lin Fourguet Moncy (tecnician animator pastorau) e Mathilde Esquer (museografa, responsabla de la refonta deu Musèu d’Aussau) que participèn a la taula redona « Patrimòni culturau immateriau : conéisher, transméter, valorizar » a l’escadença deu tresau dia de formacion.

Au començament de la setmana, los estudiants que podón descobrir los contes pirenencs dab David Bordes e Pierre Vidal, ondrats de cants dab Los Arrosecs. Qu’assistín tanben a ua diffusion publica, au cinèma de Laruntz, deu fime de Didier Peyrusqué, Amontanhada en Aussau, seguit d’ua discussion enter l’autor deu film, Patrice Peyrucq, pastor deu filme, e la sala, qui amassè 130 personas. En fin de setmana, los estudiants que realizèn un exercici d’enquèsta peu territòri au près de detentors de saber-har de la Vath d’Aussau.

Espiatz quauques fòtos de la formacion :