Aqueste Lexic de la petita enfança, francés-occitan, qu’ei la responsa de l’InÒc Aquitània a ua demanda hèita en 2011 en peu Conselh generau deus Pirenèus Atlantics, e validada peu Conselh regionau d’Aquitània, dens l’encastre de l’acompanhament lingüistic de la creacion d’ua ninoèra bilingua en Vath d’Aussau : Pimponet. Aqueth lexic que correspon a la nosta mission prioritària, la de la socializacion de la lenga occitana en Aquitània.

La basa de dadas en francés qu’estó hargada sus la sòla de mots, classificats alfabeticament, tirats deu « Yezh ar vugale / Le breton des enfants et des tout-petits ». Que volem arremerciar ací Dastumad per la soa ajuda preciosa. Aquera basa de dadas qu’estó hornida de tèrmis qui trobavam de manca e de quauques tèrmis collectats dab primolocutors de la Vath d’Aussau.

Ua part de las expressions tematicas qui pertòcan los besonhs de l’equipa professionau de Pimponet, mes tanben de cap a parents qui non parlan pas, qu’ei tanben presentada en ortografia « fonetica ».

De mei, que i trobaratz tanben quauquas proposicions de tèrmis ipocoristics, entà poder aperar aus mainatges.

Las proposicions hèitas que son en « bearnés », l’expression lingüistica de la màger part deu departament deus Pirenèus Atlantics. Aquesta basa que poderà servir ad aisa, en seguir, tà l’ensemble deu domèni gascon e aquitan, e lhèu au-delà.

Aqueste tribalh qu’estó hèit peu pòle Lenga & Societat de l’InÒc Aquitània, qui’s virè cap a Eric Gonzalès, escrivan e expèrt, entà har las preconizacions de qui cau.

Aqueste Lexic de la petita enfança que s’inscriu dens ua seguida de lexics volut peu Conselh generau deus Pirenèus Atlantics, qui son comandats a l’InÒc Aquitània per las collectivitats territoriaus partenàrias e l’Estat dab la DRAC Aquitània, entà dar a la lenga de uei e de doman los apèrs lingüistics de qui cau entau son mantien e entau son desvolopament. Qu’esperam que serà lo companh fidèu deu personau, deus associatius e deus parents de Pimponet, atau com de totas las familhas e de tots los qui tribalhan tà çò de la petita enfança.

Teledescargar lo lexic.