La calandreta de Pau qu'a realizat un DVD de Un còp èra… Jan, John and Jazz, lo son espectacle sus la Grana guèrra qui mescla musica tradicionau e jazz.

Lo CIRDÒC que realiza videoguidas tà har descobrir totas las riquessas deu patrimòni occitan dens vidèos cortas e animadas. 

« Suivez Minvielle If you can » que sortí lo 3 de març. Aqueth doble CD qu'ei ua sòrta de retrospectiva deu projècte « Suivez l'accent » iniciat per André Minvielle e Claude Nougaro 10 ans a. La soa tòca qu’ei de collectar e har conéisher los accents e las variantas de Seta a Bordèu, mas tanben de totas las lengas deu monde.

Eric Fraj que hè paréisher un àlbum titolat Pep el Mal, qui correspon a l'espectacle deu medish nom. Que s’ageish d’ua creacion vocau e musicau qui conta, en cançons, l'istoèra de José Fraj, lo pairbon d'Eric.

Las Amistats Max Roqueta que vienen de sortir un CD on Eric Fraj e canta tèxtes deu poèta espanhòu Federico García Lorca. Qu'ei Max Roqueta qui hasó l'arrevirada en occitan.

« Conta'm », l'associacion qui hè doblatge en occitan, que sòrt de har paréisher tres DVD’s. « Gruffalò », « Kerity, l’ostal dels contes » e « Lo jorn de las gralhas », d’ara enlà que's pòden espiar en lenga nosta.

Los escolans deu collègi Calandreta Leon Còrdas que hèn paréisher un CD titolat Ieu soi. Que i podetz enténer occitan, francés e drin d'anglés.

Daunas de còr, lo grop feminin de polifonias de Tarba, que hè espelir lo son purmèr CD. Que's ditz « AirEtèras » e que i trobaratz un detzenat de cançons interpretadas per las sheis hemnas deu grop.

Lo grop aussalés Los de Laruntz, animat per Jean-Claude Coudouy, que vien de sortir un CD titolat Dans ma Vallée d’Ossau. Que compta quinze títols, dètz en occitan e cinc en francés.

Entà poder arrevirar lo menut setmanèr deu restaurant lo "Cap e Tot", l'InÒc Aquitània qu'a hèit un lexic de mei de 430 tèrmis culinaris.

Lexic multilingüe de l'Internet qu'esta hèit en l'encastre d'un projècte miat per la Societat francesa de Terminologia au quau participè l’InÒc Aquitània.

Lexic multilingüe deu comèrci electronic qu'esta hèit en l'encastre d'un projècte miat per la Societat francesa de Terminologia au quau participè l’InÒc Aquitània.