Acompanhament de la collectivitats territoriaus - Expertisa

L’InÒc Aquitània que pòrta, quan ei sollicitat, ua expertisa – en l'airau de las soas missions – a las collectivitats, servicis au public, associacions màgers d'Aquitània o enterpresas. Que hica en òbra entad aquò har, competéncias d'engenheria lingüistica e culturau e d'ajuda au montatge financèr. Qu'arcuelh lo portaire de projècte, hè un prumèr diagnostic entà definir las collaboracions qui's pòden imaginar en l'encastre de las soas missions. Que hica en òbra l'acompanhament tecnic, lingüistic e/o culturau

Valorizacion e socializacion de la lenga occitana en la vita publica

Engenheria lingüistica : har véder e har enténer la lenga
L'InÒc Aquitània que hè tribalhs d'engenheria lingüistica, com conselh individualizat entà las personas, actors culturaus e sociaus, las associacions e las enterpresas. L'idea qu'ei de sensibilizar a la valorizacion de l'occitan e de contribuir atau a la soa utilizacion per la senhaletica e la comunicacion. Que jòga tanben un ròtle d'assisténcia tecnica e de « pòle ressorsa » auprès de las collectivitats territoriaus qui vòlen utilizar e promòver la lenga occitana.
Entà crear un environament favorable a la (re)coneishença de la lenga, a la soa practica eretada en familha o apresa a l'escòla, a l'universitat o en cors d'adultes, l'InÒc Aquitània que hè desempuish 2003 ua campanha de vòts entà díser la Bona Annada ! en supòrts divèrs suu territòri de mantuas regions occitanas.

Toponimia
L'InÒc Aquitània que respon a tota las demandas de restitucion e de validacion deus toponimes occitans, de coordinacion de projèctes editoriaus toponimics e de realizacion d'enquèstas microtoponimicas.

Traduccion e conselh
L'InÒC Aquitània que respon a totas las demandas pertocant traduccions deu francés a l'occitan o dens lo sens contrari en la soa fòrma gascona e tanben las autas variantas presentas en Aquitània (lemosina e lengadociana) de cap tà las collectivitats territoriaus, las EPCI, las enterpresas, las institucions, las associacions e las personas.
L'InÒc Aquitània que pòt tradusir tèxtes divèrs : liberets de comunicacion, documents de presentacion, documents administratius, sites internet, guidas, logiciaus, paraulas de cantas, menuts de noças, epitafis, batiadas, noms d'ostaus, etc.
L'InÒc Aquitània que da conselhs tanben entau bilingüisme en la vita economica e sociau.

Realizacion de lexics especializats – Terminologia
La terminologia qu'ei essenciau entà dar a l'occitan tèrmis deus naus e/o en domenis d'activitat especializats entà's poder adaptar a descríver miélher la realitat de uei lo dia. L'InÒc qu'elabòra mantuns utís d'aqueths (lexics, apèrs lingüistics, etc.) de mei anar mei a la demanda deus sons partenaris publics.

 

Acompanhar los actors de la lectura publica

L'InÒc Aquitània que valoriza e desvolopa las ressorsas occitans en los hialats publics de lectura. Que hè un tribalh de cap aus professionaus e infòrma lo public sus las publicacions en occitan (libes, disques, DVDs, produccions numericas) ; qu'organiza encontres entà ajudar a har conéisher l'escriut occitan ; qu'acompanha las bibliotècas departamentaus de prèst e las mediatècas entà constituïr lo lor hons occitan, en relacion dab lo lor territòri (literatura, joenessa, manuaus, diccionaris, ensais, CDs, DVDs : la coeréncia prepausada que permet a un public hòrt variat de trobar la matèria entà léger, apregondir las soas coneishenças, e diverstí's) ; que prepausa formacions aus professionaus de las mediatècas, etc.
Anatz aus recors literaris, audiovisuaus e musicaus.

 

Identificar e avalorar lo patrimòni culturau immateriau

La Convencion per la Sauvaguarda deu Patrimòni Culturau Immateriau de l’Unesco (2003) que tanh a las « practicas, representacions, expressions, a las coneishenças e aus saber-har, autant com aus instruments, objèctes, artefacts e espacis culturaus que i son associats, que las comunautats, los grops e, quan s'escad, los indivudús, e reconeishen com partida deu lor patrimòni culturau. » Que defeneish lo PCI com un patrimòni tradicionau, contemporanèu e viu en medish temps.
L’InÒc Aquitània que hè atau l'inventari de las practicas e deus saber-har en Aquitània e tribalha tà'us transméter e tà'us desvolopar.
Qu'assegura la mesa en valor deus repertòris de la literatura orau (musica, cant, conte) e de las practicas tradicionaus peu biaish d'accions d'engenheria de formacion, produccion d'apèrs de transmission e d'ajuda au desvolopament d'espacis de las practicas tradicionaus.

 

Enquestar e har captacions audiovisuaus

L’InÒc Aquitània qu'organiza collèctas audiovisuaus dens l'encastre de programas publics, que sia tà l'inventari deu PCI o entà la constitucion d'archius d'ua memòria en occitan : Collèctas memoriaus o captacions de creacions musicaus e literàrias a l'entorn deus trobadors aquitans. Las captacions que son lo mei sovent realizadas per professionaus e las enquèstas per personas bilinguas o per associacions partenàrias de l'InÒc.

 

Har vàler numericament patrimònis

sondaqui.com
trobar-aquitaine.org
patrimoine-immateriel-aquitaine.org

Entà que sian miélher coneishudas las riquessas deu patrimòni occitan, entà que sia conseishuda l'actualitat de las practicas vivas e deus saber-har, e tà que las ressorsas deus hons patrimoniaus ancians e sian de bon accedir tà tots (archius sonòres, e audiovisuaus, recors bibliografics), l'InÒc Aquitània que met en plaça sites internet tematics e mustras numericas en linha, en ligason dab Aquitània Culturas Connectadas.

 

Sauvaguardar archius oraus entà que sian de bon accedir

L’InÒc Aquitània qu'acompanha las collectivitats en las etapas diferentas deus procèssus de sauvaguarda deus archius oraus : inventari de las sorças privadas e associativas, assiténcias a mestresa d'obratge per la numerizacion deus hons (hèita per prestataris privats), descripcion archivistica segon las nòrmas publicas , collècta sonòra e audiovisuau. En generau las mestresas d'obratge que son coordonadas en aqueth domeni peus servicis departamentaus d'archius.
Avètz enregistraments ? Contactatz-nse, qu'avaloraram amassa las condicions de la lor sauvaguarda.

 

Educacion artistica e culturau

En direccion deus ensenhants e deus publics escolars, l'InÒc Aquitània que da ua accessibilitat en linha a las ressorças numericas artisticas et culturaus deu maine occitan en prepausar ua mesa en perspectiva patrimoniau d'aqueras ressorças numericas (musicau, organologica, museografica, antropologica, coregrafica...).
DaquíDòc, l'apèr d'educacion artistica e culturau entaus ensenhants, formators e escolans... hèit entà partir tà la descobèrta deus patrimònis occitans en Aquitània e favorizar la creacion contemporanèa, que serà lèu en linha.